Váldostivra dohkkehii jagi 2023 bušeahttaárvalusa ja ođđa hálddahusnjuolggadusa

Ohcejoga gieldda váldostivra čoahkkanii duorastaga 15.12. jagi maŋimuš čoahkkimii. Váldostivra gieđahalai earret eará gieldda jagi 2023 bušeahttaárvalusa, jagiid 2024–2025 ekonomiijaplánaid ja hálddahusnjuolggadusa beaivádeami. Čoahkkimis ságastalle aktiivvalaččat maiddái ođđa vejolašvuođain nannet Ohcejoga gieldda eallinfámu.

jagi 2023 bušeahttaárvalus ja ekonomiijaplánat

Váldostivra dohkkehii čoahkkimisttis gieldda jagi 2023 bušeahttaárvalusa ja jagiid 2024–2025 ekonomiijaplánaid dego gielddaráđđehus lei evttohan.

Dán oktavuođas váldostivra attii gielddaráđđehussii 250 000 euro loatnaváldinfápmudusa. Loana váldimii ferte gielddaráđđehusa mielde ráhkkanit vuoi gielddas lea máksingearggusvuohta Ohcejoga gieldda ekonomalaš dili ja investerenplánii čállojuvvon investeremiid dihte.

Sihke Ohcejoga gieldda bušeahttaárvalussii 2023 ja ekonomiijaplánaide 2024–2025 sáhttá oahpásmuvvat dákko.

ođđa hálddahusnjuolggadus

Váldostivra dohkkehii maiddái gieldda ođđa hálddahusnjuolggadusa. Beaiváduvvon hálddahusjuolggadus boahtá fápmui 1.1.2023.

Hálddahusnjuolggadussii dahkkon guovddáš nuppástusat leat vuođđodorvolávdegotti ja čuvgehusdoaimma sáme- ja suomagiel juhkosiid heaittiheapmi ja teknihkalaš- ja eallinfápmolávdegottiid ovttastahttin. Teknihkalaš ja eallinfámu doaibmasurggiid oktasaš strategalaš mihttomeriide ja njuovžilis oktasašbargui leat oaidnán dárbbu earret eará Ohcejoga fáhkka ráhkadusnuppástusa, sode-ođastusa, eanapolitihka ja lávva-, viesso- ja giddodatáššiid dihte. Ođastus geahppuda maid hálddahusa ja beavttálmahttá resurssaid geavaheami.

Hálddahusnjuolggadusa nuppástusaide sáhttá oahpásmuvvat dákko.

ságastallan eallinfámu ovddideamis

Čoahkkimis ságastalle aktiivvalaččat maiddái gieldda eallinfámu ovddidanvejolašvuođain. Váldostivrra áirasat evttohedje earret eará easttahis vázzinbálgáid, čierastallanluohkáid ja falástallantráhpaid oččodeami gildii.

Áirras Ilmari Tapiola evttohiige, ahte gieldda investerenplánii lasihuvvo boahtte jahkái 10 000 euro čierastallanluohká ja 10 000 euro vázzinbálgáid plánemii. Áirasat Sammol Lukkari (Olgešbellodat) ja Mika Aikio (SDB) doarjjuiga Tapiola evttohusa. Váldostivra goittotge mearridii jienaiguin 8–5 dohkkehit gielddaráđđehusa álgoálgosaš ruhtadoalloárvalusa lasáhusaid haga.

Gieldda eallinfápmohoavda Tanja Lepistö logai čoahkkimis, ahte son lea guldalan váldostivrra ságastallama eallinfámu ovddideamis iluin. Lepistö muitalii, ahte Ohcejoga gielda joatká aktiivvalaš barggu eallinfámu nannema ovdii maiddái boahtte jagi earret eará ođđa gieldastrategiija ja eanapolitihkalaš prográmma dahkama oktavuođas.

ČOAHKKINBEAVDEGIRJI LOHKANLÁHKAI

Váldostivrra čoahkkima olles beavdegirjji sáhttá lohkat dárkkisteami maŋŋá min neahttasiiddus.

ČOAHKKIN GEAHČČANLÁHKAI

Váldostivrra čoahkkimat streamejuvvojit ja daid sáhttá geahččat sihke njuolggosáttan ja maŋŋelgihtii báddin Ohcejoga gieldda Youtube-kanálas. Sihke álgoálgosaš ja tulkojuvvon čoahkkinbáttit almmustahttojit kanálas editerema maŋŋá.