THL lea dárkkálmahttán riskajoavkkuid koronaboahkohanortnega – Ohcejoga gielda vuordá ain dieđu boahkuid fidnemis

Dearvvasvuođa- ja buresveadjinlágádus THL lea dárkkálmahttán riskajoavkkuid meroštallamiid koronaboahkohusaid váras. THL lea dahkan prioriserejuvvon listtu, man vuođul koronaboahkut fállojuvvojit vuollái 70-jahkásaš olbmuide, geat gullet riskajoavkkuide.

Ahki dagaha stuorámus riskka duođalaččat buohccát koronavirusa dihte. Dasa lassin olbmo duogášbuozalmasvuođat sáhttet dagahit stuorát riskka gártat koronavirusa dihte buohcceviesso- dahje beaktilis dikšui dahje jápmit dávdda geažil. Duogášbuozalmasvuođat leat juhkkojuvvon guovtti jovkui dan mielde, man stuorrát buozalmasvuohta váikkoha garra koronavirusdávdda šaddamii. Dáid joavkkuin koronaboahkohusat fállojuvvojit vuos jovkui 1 ja dan maŋŋá jovkui 2.

Joavku 1: Olbmot, geain lea buozalmasvuohta dahje dilli, mii dagaha erenomáš stuorra riskka duođalaččat buohccát koronavirusa geažil

• Orgánatransplantašuvdna dahje dákteađatransplantašuvdna (su. elinsiirto tai kantasolusiirto)
• Aktiivvalaš divššu borasdávda
• Immunaortnega váigadis hehttehus
• Váigadis bissovaš manimušsivva
• Váigadis bissovaš geahpessivva
• Tiippa 2 diabetes, mii dikšojuvvo dálkasiiguin
• Down-syndroma (ollesolbmot)

Joavku 2: Olbmot, geain lea buozalmasvuohta dahje dilli, mii dagaha riskka duođalaččat buohccát koronavirusa geažil

• Ástmá, man galgá dálkkodit jeavddalaččat
• Váigadis váibmosivva, earret eará váimmu váilevaš doaibman (ii dušše varradeaddodávda)
• Vuoiŋŋašgáldnan dahje nevrologalaš dávda/dilli, mii čuohcá vuoigŋamii
• Immunaváidudeaddji dálkkasdikšu autoimmunabuozalmasvuhtii
• Váigadis bissovaš vuoivvassivva
• Tiippa 1 diabetes dahje lassimanimuččaid váilevaš doaibman
• Váigadis oađđinapnea
• Psykosabuozalmasvuohta
• Buoidivuohta (deaddoindeaksa unnimustá 40)

Sáhtát lohkat lasi THL neahttasiiddus.

THL attii mannan vahkus ođđa ávžžuhusaid koronaboahkohusaide. THL boahkohusáššedovdijoavku ávžžuhii guhkidit koronaboahkohusaid gaskka ja addit AstraZeneca-boahkuid dušše vuollel 70-jahkásaččaide. Sáhtát lohkat ávžžuhusaid váikkuhusain Ohcejoga gieldda boahkohemiide dákko.

Ohcejoga gielda dieđiha ođđa boahkohanáiggiin dalán, go oažžu dieđu boahkuid fidnemis. Gielda lea vuosttamužžan oktavuođas badjel 80-jahkásaččaide, geat eai velá leat boahkohuvvon. Mii váldit maiddái oktavuođa daidda, geaid beavttálmahttinboahkohusaid áigi sirdojuvvo, ja šiehttat ođđa áiggi.

Lasi dieđuid boahkohusain oažžu telefovnna bokte Ohcejoga dearvvasvuođaguovddážis árgan dmu 9–11 ja dmu 13–15, tel. 040 181 0288.