Presideanta Alexander Stubb galledeapmi lihkostuvai bures
24,5.2024
Presideanta Alexander Stubb galledeapmi lihkostuvai bures. – Mis lei ikte fiinna beaivi Ohcejogas, illuda gielddahoavda Päivi Kontio. – Presideanta Alexander Stubb galledeapmi lihkostuvai buot buohkanassii erenoamáš bures. Maiddái dálki lei midjiide šiega.
– Sávan stuorra giitosiid buohkaide, leat ledje mielde ordnemin lihkostuvvan beaivvi, giitala Päivi. – Mii válmmaštalaimet galledeami sullii njeallje vahku ovttas presideantta kansliijain. Ovttasbarggu lei njuovžil ja dat manai hui bures, dás maid stuorra giitosat kansliija vehkii.
– Erenoamáš giitosat min gieldalaččaide, geat válde presideantta čábbát vuostá. Dás mii fidniimet giitosiid maid presideantta kansliija veagas.
– Ohcejoga luondu ja duovdagat lapmudedje sihke presideantta ja su fáru. Mun gáttán, ahte mii basttiimet giktit kansliija veaga maid sin asttuáigge deikke. Maiddái presideanta niegada sihkkelastinmátkkiin davimus Supmii.
– Mii fidniimet ollu riikkaviidosaš mediafuopmášumi. Dakkára eat livčče fidnen makkárge ruđain.
Presideanta Alexander Stubb seaivvui helikopteriin Stuorrageađggevárrái Njuorggámii. Su prográmma sisttisdoalai galledeami EU davimus čuoggái, gos son finihii maid Norgga bealde. Njuorggáma skuvllas lei liekkus vuostáiváldin ja presideanta dearvvahii mánáid nu, ahte vuoigŋa lei albma láhkai rabas ja liekkus.
Gieldda ja bálgosiid ovddasteaddjiiguin presideanta ságastalai earret eará guolástangielddu dili ja dan váikkuhusaid ja vel boazodoalu birra. Lassin sii ságastalle davi eatnandieđalaš sajádaga mearkkašumi birra, mii lea lassánan dálá máilmmipolitihkalaš dili mielde.
Gilidálu Giissá šiljus ledje eatnat ohcejohkalaččat deaivvadeamen presideanttain. Presideanta beasai máŋga oktasašgovvii báikkálaččaiguin. Prográmmii gulle sáhkavuorut, musihkka ja jearahallamat.
Beaivi Ohcejogas nogai Geavu dutkanguovddážii, gos presideanta deaivvadii Meahciráđđehusa njunušhoavddain ja ráđđádallangotti lahtuiguin. Geavu bálgáin presideanta váccašii oanehaččat, ovdal go mátkkoštii helikopteriin Anárii.