Gieldda váldostivrra čoahkkimis 21.5. dii. 11.00 mánáide ja nuoraide laktáseaddji áššit
16.5.2024
Ohcejoga gieldda váldostivra čoahkkana 21.5. dii. 11.00 mearridit mánáid ja nuoraid buresveadjinplána ja servvolaš oahppofuolahusa ovddideami birra.
Mánáidsuodjalanláhka geatnegahttá gielddaid gárvvistit plána, mainna ovddidit mánáid ja nuoraid buresveadjima sihke mánáidsuodjalusa ordnema ja ovdánahttima. Plána stivre mánáid ja nuoraid buresveadjima ovddideami gielddas. Gárvvistuvvon plána lea fámus boahtte jagi lohppii ja dat biddjo áiggi dássái váldostivrabajiid mielde.
Gielda lea ožžon Oahpahus- ja kulturministeriijas 20 000 euro stáhtadoarjaga, mainna ovddidit servvolaš oahppofuolahusa sierra dásiid oahpahusas ja skuvlemis. Sierradoarjaga sáhttá geavahit servvolaš oahppifuolahusa ja ovddalgihtii eastadeaddji barggu ovddideapmái skuvla- ja bargobeaivve áigge. Doarjagiin bálkáhuvvo boahtte lohkanjahkái psykiátralaš buohccedivššár oahpaheaddjiid ja oahpahusjoavkkuid doarjjan. Gieldda iešruhtadanoassi lea 30 %.
ČUOVO ČOAHKKIMA RÁVDNJEMA BOKTE
Váldostivrra čoahkkimat leat rahpasat geahččiide ja guldaleaddjiide. Čoahkkima sáhttá čuovvut njuolggorávdnjema bokte Ohcejoga gieldda Youtube-kanálas duorastaga 21.5. sullii dii. 11 rájes. Čoahkkin vurkejuvvo ja vurkkohus lea oaidnin láhkai seamma kanálas njuolggosáddaga maŋŋá.
Čoahkkin dulkojuvvo simultánadulkomin sámegielas suomagillii. Dulkojuvvon čoahkkinvurkkohus almmustahtto Youtube-kanálas editerema maŋŋá.
OAHPÁSMUVA ČOAHKKIMA ÁŠŠELISTUI
Oahpásmuva čoahkkima áššelistui dákko. Čoahkkimiid beavdegirjjit almmustahttojit dárkkisteami maŋŋá min neahttasiidduin.